विशाखापट्टणम:
भारताने कसोटी मालिकेतील पहिल्याच सामन्यात दक्षिण आफ्रिकेवर २०३ धावांनी दणदणीत मात करत मालिकेत १-० अशी विजयाची आघाडी घेतली. दक्षिण आफ्रिकेच्या दुसऱ्या डावात मोहम्मद शमी (५/३५) आणि रवींद्र जडेजा (४/८७) यांनी सर्वाधिक बळी मिळवत भारताच्या विजयाचा मार्ग सुकर केला. भारत विरुद्ध दक्षिण आफ्रिका कसोटी मालिकेतील पहिल्याच सामन्याच्या पाचव्या आणि शेवटच्या दिवशी टीम इंडियाला विजयासाठी ९ बळींची आवश्यकता होती. लय सापडलेल्या टीम इंडियाने दिवसाच्या दोन सत्रांमध्येच हा विजय आपल्या नावे केला. दिवसाच्या पहिल्याच सत्रात मोहम्मद शमी आणि रविंद्र जडेजा यांच्या घातक फिरकी गोलंदाजीने दक्षिण आफ्रिकेचे एक मागोमाग एक असे ७ फलंदाज तंबूत धाडले. विजयासाठी केवळ दोनच बळी दूर असताना भारताने दुसऱ्या सत्रात २२ षटके फेकत या सामन्यावर आपले नाव कोरले. या सामन्यात ८ बळी मिळवणारा रविचंद्रन अश्विनने सर्वात जलद बळी मिळवण्याच्या जागतिक विक्रमाशी बरोबरी साधली. यापूर्वी शनिवारी भारताने आपल्या दुसऱ्या डावात रोहित शर्माच्या (१२७) दमदार शतकाच्या जोरावर भारताने ३२३/४ च्या धावसंख्येवर आपला डाव घोषित केला. भारताला पहिल्या डावात ७१ धावांची आघाडी मिळाली होती. अशा प्रकारे आफ्रिका संघापुढे विजयासाठी ३९५ धावांचे लक्ष्य होते. हे लक्ष्य गाठण्याच्या प्रयत्नात आफ्रिकेने शनिवारी चौथ्या दिवसाचा खेळ संपताना ११ धावांवर आपला गडी गमावला. इथून पुढे आपला खेळ सुरू करण्यासाठी मैदानात उतरलेल्या आफ्रिका संघासाठी रविवार आपल्या बाजूने वळवण्यात यश आले नाही.अश्विनने केली जागतिक विक्रमाशी बरोबरी या कसोटीमध्ये अश्विनने ८ वा बळी मिळवत आपली बळींची संख्या ३५० वर नेली. आपल्या कारकिर्दीतील ६६ वा कसोटी सामना खेळणाऱ्या या ऑफ स्पिनरने सर्वात जलद बळी घेण्याच्या जागतिक विक्रमाशी बरोबरी केली. आता अश्विन सर्वात जलद बळी मिळवणाऱ्या श्रीलंकेच्या मुथैय्या मुरलीधरनसह संयुक्तपणे अव्वल स्थानी आहे.असा रंगला सामना यापूर्वी या कसोटी सामन्याच्या सुरुवातीला टीम इंडियाने नाणेफेक जिंकून प्रथम फलंदाजी केली. सलामीची जोडी मयंक अग्रवाल (२१५) आणि रोहित शर्मा (१६६) यांच्या शानदार खेळामुळे भारताने ५२०/७ च्या स्कोअरवर पहिला डाव घोषित केला. यानंतर टीम इंडियाने पाहुण्या संघाला ४३१ धावांवर रोखले आणि 71 धावांची आघाडी मिळवली. पहिल्या डावातही दक्षिण आफ्रिका संघाची घसरण झाली, परंतु त्यानंतर डीन एल्गर (१६०), क्विंटन डी कॉक (१११) यांनी आपले शतक झळकावले आणि कर्णधार फाफ डु प्लेसिसने (५५) चांगली धावसंख्या गाठली. आफ्रिका संघाच्या पहिल्या डावात स्टार ऑफ स्पिनर रविचंद्रन अश्विनने ७/१४५ बळी घेतले.
दुसऱ्या डावात रोहित, पुजारा चमकले दुसर्‍या डावातही भारताने शानदार खेळ केला. यावेळी रोहित शर्माने (१२७) पुन्हा शतकी खेळी केली. रोहितबरोबरच चेतेश्वर पुजारानेही ८१ धावांची शानदार खेळी खेळली. भारताने आपला दुसरा डाव ३२३/४ वर घोषित केला आणि दक्षिण आफ्रिकेला विजयासाठी ३९५ धावांचे लक्ष्य दिले. आफ्रिका संघाला आपल्या पहिल्या डावाप्रमाणे दुसऱ्या डावातही चांगला खेळ खेळण्याची अपेक्षा होती. मात्र, भारतीय गोलंदजांच्या भेदक माऱ्यापुढे त्यांचे काही चालले नाही. भारत विरुद्ध दक्षिण आफ्रिका कसोटी मालिकेतील दुसरा कसोटी सामना गुरुवारपासून पुण्यात सुरू होत आहे.

LEAVE A REPLY

Please enter your comment!
Please enter your name here