नवीन पनवेल : बँकिंग उद्योगात अग्रेसर असलेल्या बँक ऑफ महाराष्ट्र, नवी मुंबई झोनच्या अंतर्गत येणाऱ्या नवीन पनवेल शाखेने आपल्या वर्धापन दिनाचे औचित्य साधून शिक्षकांप्रती कृतज्ञता व्यक्त करून शिक्षक दिन मोठ्या थाटात साजरा केला. या प्रसंगी महात्मा फुले महाविद्यालय, पनवेलचे अर्थशात्र विभाग प्रमुख प्रो. डॉ. नरेश मढवी, स्वाभिमानी शिक्षक संघटनेचे अध्यक्ष मा. सुभाष भोपी, बँकेच्या नवीन पनवेल शाखेच्या शाखा प्रबंधक, पुष्पा खत्री, उप प्रबंधक, शुभांगी शुक्ला व विशेष सहाय्यक, अरविंद मोरे उपस्थित होते.
प्रमुख अतिथी सुभाष भोपी म्हणाले की, बँक ऑफ महाराष्ट्र नेहमीच सामाजिक कार्यात अग्रेसर असते ही खरोखर अभिमानास्पद बाब आहे. जेव्हा पासून शिक्षक वर्ग बँकेशी जोडला आहे तेव्हा पासून बँकेच्या सेवेबद्दल सर्व शिक्षक समाधानी आहेत. बँक शिक्षकांच्या आर्थिक गरजा तत्परतेने पूर्ण करते ही सुद्धा जमेची बाब आहे. बँकेने आज वर्धापन दिना निमित्त शिक्षकांचा सत्कार केला त्याबद्दल आभार व्यक्त करून शिक्षकांना अधिक प्रेरणा मिळेल अशी प्रतिक्रिया व्यक्त केली व बँकेस शुभेच्छा दिल्या. डॉ. नरेश मढवी सर म्हणाले की, बँक ऑफ महाराष्ट्र, नवीन पनवेल ही नेहमीच ग्राहकांभिमुख विविध नाविन्यपूर्ण कार्यक्रम राबवित असते. डॉ. नरेश मढवी सर म्हणाले की, ते पहिल्या दिवसापांसूनच नवीन पनवेल शाखेचे ग्राहक असून त्यांच्या कुटुंबातील सर्व सभासदांची खाती बँकेत आहेत व ते बँकेच्या गोल्ड बॉण्डपासून तर बँकेच्या सर्व उत्पादनांची सेवा घेत आहेत असे त्यांनी सांगितले. बँक ऑफ महाराष्ट्र ही सर्व सामान्यांची बँक असून नवीन पनवेल शाखेने जनधनची खाती उघडण्याचे उल्लेखनीय कार्य केले आहे.
कार्यक्रमाचे प्रास्ताविक करतांना शाखा प्रबंधक, पुष्पा खत्री म्हटल्या की, बँक सध्या बँकेच्या ८७ व्या वर्धापन दिना निमित्त उत्सव धमाका आयोजित करीत आहे. ह्या उत्सव धमाक्यात बँकेने विविध कर्ज योजनांमध्ये भरघोस सवलती दिलेल्या आहेत. ह्या सवलतींचा जास्तीत जास्त ग्राहकांनी लाभ घ्यावा असे आवाहन केले. पुष्पा खत्री म्हणाल्या की, बँकेला त्यांच्या शिक्षक ग्राहकांचा सत्कार करतांना त्यांच्या प्रति कृतज्ञता व्यक्त करतांना अभिमान वाटत आहे कारण की शिक्षक हा असा वर्ग आहे की, तो जीवनभर विद्यार्थी, समाज व एक चांगला देश घडविण्यासाठी काम करीत असतो. या प्रसंगी त्यांनी उपस्थित शिक्षक डॉ प्रो. नरेश मढवी, सुभाष भोपी, संदीप जुईकर, संजय सावळे, सज्जाद पठाण, सारिका रघुवंशी, रजनी इंगळे, स्वाती खराडे, मीना फुलपगारे, प्रतिभा कुडेकर, गोपीनाथ थळी यांचा सन्मानचिन्ह व पुष्पगुच्छ देऊन सत्कार केला.
