दीपक फर्टीलायझर व ईशान्य फाउंडेशन मार्फत राबविला उपक्रम
पनवेल :
२६ जानेवारी २०२२ रोजी प्रजासत्ताक दिनानिमित्त दीपक फर्टीलायझर आणि ईशान्य फाउंडेशन यांच्यावतीने सीएसआर अंतर्गत परिसरातील ३७ वाड्यांवरील लाभार्थींना दीपक फर्टिलायझर कंपनीचे प्लांट हेड राधेश्याम सिंग, पनवेल पंचायत समितीचे माजी सभापती तसेच शेतकरी कामगार पक्षाचे पनवेल विधानसभा अध्यक्ष काशिनाथ पाटील, नगरसेविका अरुणा किरण दाभणे तसेच एव्हीपी कोर्पोरेट अफेयर्स कंपनीचे अरुण शिर्के, सिनियर मॅनेजर अभिजित शिंदे यांच्या हस्ते जल उपसा सिंचनासाठी साहित्य वितरण करण्यात आले.
तळोजा विभागामध्ये दीपक फर्टिलायझर कंपनीच्या सीएसआर उपक्रमांतर्गत व ईशान्य फाउंडेशन मार्फत सन २०१२-१३ पासून परिसरातील आदिवासी वाड्यांवर कार्यक्रम राबवला जात आहे. या कार्यक्रमाचे मुख्य उद्धिष्ट हे शेतकऱ्यांचे उत्पन्न वाढवणे व कुटुंबाचा सर्वागीण विकास साधणे असे असून या कर्यक्रमांतर्गत एका लाभार्थ्यास अर्धा एकर क्षेत्रावर आंबा लागवड करण्यास मदत केली जाते. तसेच या झाडांचे योग्य संगोपन करण्यासाठी शेतकऱ्यांना प्रशिक्षण, लागणारी खते व औषधे, पाणी व्यवस्थापनासाठी विविध प्रकारची जल उपसा साहित्य खरेदी करण्यास मदत केली जाते, येथील शेतकऱ्यांना भाजीपाला व फुलशेती करण्यास प्रोत्साहित केले जात असून त्यासाठी लागणारे बियाणे व रोपे देखील या उपक्रमांतर्गत दिले जात आहेत.
या व्यतिरिक्त या उपक्रमांतर्गत शेतकऱ्यांना आंबा कलम बनविणे, भाजीपाला पिकाची ट्रे मध्ये रोपे बनविणे तसेच मोगऱ्याची रोपे तयार करण्याचे प्रशिक्षण व साहित्य दिले आहे. आज मितीस या भागातील शेतऱ्यांनी हजारो रोपे बनविली आहेत व त्यांची विक्री देखील होत आहे. यामधून शेतकऱ्यांना चांगले पैसे मिळत आहेत. या उपक्रमांतर्गत आतापर्यंत ५८६ लाभार्थींनी लाभ घेतला असून या १२००० पेक्षा जास्त आंबा लागवड केली आहे. काही शेतकऱ्यांचे आंबा पिकाचे उत्पन्न देखील सुरु झाले आहे. सर्व आंबा फळे हे दीपक फर्टीलायझर कंपनीमध्ये विकली जात असून शेतकऱ्यांना मार्केट पेक्षा जास्त भाव मिळत आहे. या उपक्रमामुळे शेतकऱ्यांच्या उत्पन्नाबरोबर पर्यावरण संवर्धनाचेही काम होत आहे.
